Қазақ әдебиеті - қазақ халқының ғасырлар қойнауынан ұрпақтан ұрпаққа жеткен рухани, мәдени мұрасы, сөз өнерiнiң асыл қазынасы. Қазір қазақ әдебиетінің туындыларын тиісінше оқып, зерделеп талқылауда өткір қажеттілік туындады. Дәл осы мақсатта кітап оқу, кітапқа деген қызығушылықты арттыру, халқымыздың әдеби мұрасын зерттеп, рухани мұраны сақтау мақсатында Қазақстанда республикалық «Бір ел - бір кітап» акциясы ҚР Мәдениет министрлігінің қолдауымен ҚР Ұлттық академиялық кітапханасы мен ҚР Кітапханашылар Ассоциациясы бастамасымен 2007 жылдан бастау алған болатын.

     Биыл «Бір ел - бір кітап»  акциясы аясында Ә.Тәжібаевтың поэзиясы мен Ә.Кекілбаевтың «Аңыздың ақыры» романы жалпыхалықтық оқуға ұсынылды.

     Осыған орай, 22 қаңтар күні Ә.Тәжібаев атындағы  облыстық әмбебап ғылыми кітапханасында  «Бір ел- бір кітап» акциясының ашылу салтанаты ұйымдастырылды. Акция барысында клуб мүшелері, белсенді оқырмандар Ә.Тәжібаевтың өлеңдерін, Ә.Кекілбаевтың романынан монолог оқыды. Теледидардан кітапхана жайлы деректі фильм көрсетіліп, кітап  хит парады ұйымдастырылды.  Шараға ақын-жазушылар: Қазақстан  Жазушылар Одағының мүшесі, ақын Қ.Жәленова, Қазақстан  Жазушылар Одағының мүшесі, ақын Қ.Есімсейітова, Қазақстан  Жазушылар Одағының мүшесі, жазушы Б.Ұзақбаев, Қазақстан  Жазушылар Одағының мүшесі, ақын Ғ.Әбілдаева, ақын А.Толыбаев және Қорқыт Ата атындағы Қызылорда мемлекеттік университетінің оқытушылары мен  студенттері, колледж студенттері, БАҚ өкілдері қатысты. Кітап көрмесіне және даналық ағашына  библиографиялық шолу жасалынды.




Ә.Тәжібаев атындағы облыстық әмбебап ғылыми кі тапханасында 2018 жылдың 3 қазан күні республикалық «Бір ел – бір кітап » акциясының таңдауы бойынша Н.Келімбетовтың «Үміт үзгім келмейді» хикаяты бойынша оқырмандар конференциясы ұйымдастырылды.

     Мақсаты: жастарымызды ерлік пен батырлыққа, патриотизмге шақыратын,  рухты көтеретін, өмірге құштарлықты насихаттайтын кітаптардың көбірек оқылуына  ықпал  жасау.

     Шара барысында хикаят-монологтың басты кейіпкері Ержанның басынан кешкен қиын тағдыры, өмір мен өлім арасында арпалысқан ойлары негізгі тақырыпқа айналды. Аурухана төсегіне таңылған ер мінезді, жігерлі Ержанның өмірдің құндылығы, қилы тағдырларды суреттеген монолог оқырманын терең ойға батырды.

     Шараға «Болашақ» университеті мен «Ұлағат» көпсалалы колледжі студенттері  және кітапхана оқырмандары  қатысты.

 

«Бір ел - бір кітап» акциясы аясында 2017 жылдың таңдауы – Сұлтанмахмұт Торайғыровтың шығармалары.

«Бір ел – бір кітап» республикалық акциясы аясында «Жалындап өткен жас ғұмыр» атты поэзия кеші өтті.

14 сәуір күні Ә.Тәжібаев атындағы облыстық әмбебап ғылыми кітапханасында «Бір ел – бір кітап» республикалық акциясы аясында 2017 жылы таңдалып алынған қазақ әдебиетінің ірі тұлғасы, аса көрнекті ақын Сұлтанмахмұт Торайғыровтың шығармашылығына арналған «Жалындап өткен жас ғұмыр»атты поэзия кеші өтті.

«Бір ел – бір кітап» акциясы ҚР Мәдениет министрлігінің қолдауымен ҚР Ұлттық академиялық кітапханасы мен ҚР Кітапханашылар Ассоциациясы бастамасымен 2007 жылдан бастап өткізіліп келеді. Ерекшеліктердің бірі бір мезгілде бүкіл ел болып бір кітапты оқып-талқылау болып табылады. Акцияның мақсаты – қазақ әдебиетін көпшілікке танымал ету, қоғамның кітап оқуға және Қазақстанның әдеби мұрасын зерттеуге деген қызығушылығын арттырып, өскелең ұрпақтың рухани дамуына ықпал ету.

Ұлттық әдебиетіміздегі ең үздік деген туындыны оқу және насихаттау.

Поэзия кеші сахналық көрініспен басталады.

Қараңғы қазақ көгіне,

Өрмелеп шығып, күн болам!

Қараңғылықтың көгіне

Күн болмағанда кім болам?

Сахарада өмір кешіп, үш түрлі жолда жүрген қазақ балаларының тағдыры көрсетілді. Ақын өмірдің бұралаң жолдарын көзбен көріп, көкірегіне түйіп, жырлап кеткен. Талмай ізденіп, қиындықпен алысып, шындық жолын табуға талпынған, өз тағдырын өзі жасаған, өмірі мен тағдыры өлеңінде өрілген ақын.

Кеш барысында кітапхана оқырмандары С.Торайғыровтың шығармаларынан өлеңдер оқыды. Ақынның көзін көрген замандасы Әлкей Марғұланның 1940 жылғы, туысы Шәйбай Аймановтың 1960 жылы айтылған естелігін және заманауи жазушы Роллан Сейсенбаевтың пікірін қатысушылар көрініс арқылы тыңдады және ақын ғұмырының бір үзік сырын баяндайтын сахналық қойылымды тамашалады. Көк аспанды осып өткен жасын отындай қысқа ғана тіршілігінде ұлан – ғайыр жыр жазып, артына мол мұра қалдырған ардақты ақын туралы ой-толғаныстар кеңінен талқыланды. Шараға қатысушылар «Адасқан өмір» поэмасын тыңдай отырып, жыр жолдарынан ақынның өз өміріне шолу жасағанын аңғарып, ерекше толғаныста болды.

2007 жылдан 2017 жыл аралығында «Бір ел – бір кітап» акциясы бойынша жыл кітабы атанған шығармалардың шеруі көрсетіліп, кітап көрмесіне шолу жасалынды. Кеш соңында мерекелік шағын концерт ұйымдастырылды.

Қатысушылар: Қорқыт ата атындағы ҚМУ профессоры Қ.Құдайбергенов, «Әлімсақ» журналының редакторы Н.Көбегенұлы, ақын Р. Наурызбаева,БАҚ өкілдері, оқу орындарының студенттері.

 

    "Бір ел-бір кітап"республикалық акциясының ұйымдастыру комитеті 2016 жылғы кезекті жыл кітабын таңдау мақсатында Ұлттық академиялық кітапханасында бас қосты. Еліміздің белгілі ғалымдары мен ақын-жазушылары, облыс кітапханаларының басшылары қатысқан отырыста жабық дауыс нәтижесі бойынша зар заман ақындарының арасындағы жарық жұлдыз –Дулат Бабатайұлының "Өсиетнама" кітабы жыл бойы оқылатын болды.

Дулат Бабатайұлы– ХІХ ғасырдағы қазақ поэзиясының ірі өкілі, халқымыздың басына қара бұлт төніп, жерімізді отарлау саясаты басталғанда ұлт-азаттық қозғалысын жалпыұлттық сыпатта бірінші болып қозғаған ақын.

 

Тұңғыш өлеңдер жинағы 1880 жылы Қазан қаласында "Өсиетнама" деген атпен жарыққа шыққан. Ақын өлеңдерінің тілі суретті, көркемдігі терең, тәрбиелік мәні зор.

"Ұлы ақынның өзі айтқандай сөз ұғатын, ой қадірлейтін әр адамның таным көкжиегін кеңейтуге ат салысар қадау-қадау ой түйіндері Дулат Бабатайұлының өмір таным толғамдары арқылы ұлттық қана емес, жалпыадамзаттық биіктіктен үн қатады. Егер философияны даналықты сүю деп түсінер болсақ, онда Дулат өлеңдері тереңінде тұнып жатқан тағылымды көзқарастар өзіне дейінгі де, өзінен кейінгі де ұлттық танымды жете зерделеуге жол ашатын дәйекті дәнекер, байыпты байлам, тұғырлы тұжырымдар деп бағалауға әбден лайық"

халқымыздың басына қара бұлт төніп, жерімізді отарлау саясаты басталғанда ұлт-азаттық қозғалысын жалпыұлттық сыпатта бірінші болып қозғаған ақын.